دنيکمرغه کمکي اختر په مناسبت دساپي پښتو څيړنو او پراختيا مرکز دمبارکۍ پيغام دساپي پښتو څيړنو او پراختيا مرکز د رادبره شوې نيکمرغه کمکي اختر په مناسبت ټولې اسلامي نړۍ او په ځانگړي توگه افغان مومن او مجاهد ملت ته دزړه له تله مبارکي وايي او دلوى الله په دربار کې ورته دټول افغان مجاهد ملت دسوکالۍ او يووالي غوښتنه کوي . نوموړى مرکز دنيکمرغه کمکى اختر دمبارکۍ ترڅنگ د هغو شهيدانو کورنيو ته چې دخپلې خاورې او ملي نواميسو. په دفاع کې يې خپل سرونه قربان کړي تسليت وايي او ددې کورنيو چې دزړونو ټوټې دسپيڅلې لارې (مقدس جهاد) په سنگر کې دلاسه ورکړى دلوى رب العزت په دربار کې ددوي قرباني گران دافغانستان دبشپړې خپلواکۍ او ازادۍ قرباني بولي رادبره کيدونکى کمکي اختر دې الله په افغانستان کې دواقعي ازادۍ، خپلواکۍ او سوکالۍ سبب وگرځوي . دساپى پښتو څيړنو او پراختيا مرکز بنسټوال الحاج امام الدين ساپى

د نیکمرغه کوچني اختر په مناسبت د امیرالمؤمنین شیخ الحدیث هبة الله اخندزاده( حفظه الله) د مبارکۍ پیغام بسم الله الرحمن الرحیم إن الحمد لله نحمده ونستعينه ونستغفره ونتوب إليه ونعوذ بالله من شرور أنفسنا ومن سيئات أعمالنا من يهده الله فلا مضل له ومن يضلل فلا هادي له وأشهد أن لا إله إلا الله وحده لا شريك له وأشهد أن محمدا عبده ورسوله أما بعد: قال الله تعالی :(أُذِنَ لِلَّذِينَ يُقَاتَلُونَ بِأَنَّهُمْ ظُلِمُوا ۚ وَإِنَّ اللَّهَ عَلَىٰ نَصْرِهِمْ لَقَدِيرٌ (39) الحج د افغانستان مؤمن ولس او ټول اسلامي امت ته! السلام علیکم ورحمة الله وبرکاته له هرڅه وړاندې تاسې ټولو ته د زړه له کومې د نیکمرغه کوچني اختر مبارکي وایم. الله تعالی مو د رمضان المبارک په میاشت کې ترسره کړي عبادات، صیام، قیام ، صدقات او ټول حسنه اعمال پخپل دربار کې قبول او منظور کړه. افغان مجاهد ملته! موږ سږنی اختر هم په داسې حال کې لمانځو چې لامو ګران هیواد تر اشغال لاندې او د ولس غیرتي بچیان سرښندونکي مجاهدین مو له اشغالګرو سره د هیواد د مکملې آزادۍ او اسلامي نظام د حاکمیت په غرض د دفاع او سرښندنې په مورچلونو کې قرار لري. دا ښکاره خبره ده چې د روانې جګړې پیل د تیري کوونکو له لوري شوی، هغوی د نړۍ له ډیرو لرو ساحو څخه افغانستان ته د اشغال او اسلامي نظام د ړنګولوپه نیت راغلي او اسلامي امارت له اسلامي شعائرو، خپل ولس او هیواد څخه د دفاع په منظور دفاعي جګړې ته اړایستل شوی او مقدس جهاد ته دوام ورکوي. لهذا د یادې جګړي درول او غځول په همدې تیري کوونکو بهرنیو لوریو پوري اړه لري. هغوی چې پر افغانستان یې د امنیت د تأمین په پلمه برید کړی اوس یې له امله ټوله سیمه نا آرامه کړې، دا چې هغوی هرڅومره دلته د خپلو ځواکونو په پاتي کولو او یا هم زیاتولو ټینګار کوي هغومره به ورسره منطقوي حساسیت زیاتیږي او په نتیجه کې به یې د افغانستان په شمول ټوله سیمه نوره هم بې ثباته کیږي. امریکایان باید دا خبره درک کړي چې په افغانستان کې د جګړې دوام، د بمبارونو زیاتوالی، د بیوزله افغانانو وژنه، د هغوي په خاوره کې د خپلو سیاسي حریفانو د ډارولو او نویو وسلو د آزمایلو په غرض د لویو بمونو کارول، د جهادي مقاومت د بدنامولواو کمزوري کولو لپاره د هغوی په مقابل کې په مختلفو نومونو د وسلوالو ډلو پیداکول ، تمویل او تشهیرول، د افغانانو ترمنځ د قومي، سمتي او ژبنیو شخړو راپورته کول او داسې نورو فتنو ته لمن وهل هیڅ کله هم د دوی د بریالیتوب لامل نشي کیدای، ځکه افغانان هغه قوم نه دی چې د چا زور ته د تسلیمۍ سر ټيټ کړي. زموږ له تاريخ څخه مه غافله کیږئ. بس دی چې دا تیر شپاړس کلونه مو په عبث او بې ځایه جګړه تیر کړل، بې ګټې مصارف مو وکړل، او خپل پوځي او سیاسي حیثیت مو تر پښو لاندې کړ،په زیاته اندازه عسکر مو تلف شول، افغانان مو هم شهیدان اومعیوب کړل، کورونه او نور زیربنايي تأسیسات مو ورته وران او افغانستان مو په کنډواله بدل کړ. که تاسو دا فکر کوئ، چې په خپل نظامي حضور او د عسکرو په زیاتوالي سره به زموږ حوصلې ماتې کړئ، اشتباه کوئ. د مسئلې حل دا نه دی چې د کابل د بې کفایته ادارې په غوښتنه اشغال ته ادامه ورکړی بلکې تعقل دا دی چې د واقعیتونو په درک کولو سره خپلې جنګ غوښتنونکي پاليسۍ ته تغیر ورکړئ. د افغانستان برخلیک او دلته ټول مسائل تر افغانانو پوري اړه لري. افغان غیرتي ولس نه د چا فشار ته غاړه ږدي او نه هم د خپل هیواد په چارو کې د بل چا فرمایشات مني، هغوی ته د خپل هیواد استقلال او اسلامي نظام له ځانه هم ګران او مهم دی. د افغانانو په ټاټوبي کې به تاسي د یوې نیمې لسیزې موجودیت څخه درس اخیستی وي. لهذا غوره خبره دا ده چې نور مو د اشغال غځولو اشتباه ته دوام ورنکړئ. کله هم چي پر افغانستان ستاسي ناروا اشغال ختم شي اسلامي امارت ستاسي په شمول له ټولو ګاونډیانو او نړیوالو سره د اصولو په چوکاټ کي د رغنده تعامل او ښو اړیکو جامعه تګلاره لري. دلته د اسلامي امارت ددې تګلارې یادونه ضروري بولم چې نه د چا په کورنیو چارو کې لاسوهنه کول غواړو او نه نور پریږدو چې زموږ په کورنیو چارو کې لاسوهنه وکړي او همداراز نه چا ته اجازه ورکوو چې د افغانستان خاوره د چا په خلاف استعمال کړي. مسلمان مجاهد ملته! د اشغالګرو په مقابل کي جهاد یوه الهي فریضه ده چي نه د چا په شخصي ګټو پوري تړلې اونه هم د چا د شخصي نظر په بدلون سره تغیر کوي، په شرعي احکامو او اسلامي تاریخ کې جهاد یو داسي نا څرګند باب نه دی چې هرڅوک یې په شخصي اجتهاد سره د کولو او درولو حکم صادرکړي. د اسلام په ټول تاریخ کې د مقدس جهاد ثمره د کفارو تر تسلط او قوماندې لاندي نه ده تر لاسه شوې او نه هم کله فاسدو چارواکو د الله دین نافذ کړی او نه داشغالګرو د هوایي ځواک ترسیوري لاندي د اسلامي نظام حاکمیت ممکن دی. امریکایانو زموږ په ملت ټولې هغه څيرې تپلي چې نه دین او نه د ولس ګټو ته تعهد لري. هغوی یوازې د امریکا د ګټو مدافعین دي. موږ ولیدل چې دغه بلواکه څيرې د امریکا د فرمان له مخې دې ته هم تیارې دي چې افغانستان له خپلو ګاونډیو او ټولې سیمې سره په مخالف جهت کې ودروي او یوازې د امریکا د ګټو قرباني یې کړي. که روان حالت دوام کوي، دوی دې ته هم تیار دي چې د یوموټي ولس تر منځ د قومي، سمتي او ژبنیو تعصبونو په راپارولو سره یوځل بیا د نویمو کلونو په شان ذات البیني جګړې پیل او تاریخي هیواد مو په څو ټوټو تقسیم کړي. د کابل وروستي جریانات د دغو پردي پالو د فتنه جوړوونکو هڅو ژوندۍ بیلګې دي. اسلامي امارت د هیواد د شرعي او ملي مصالحو د یوه مدافع ځواک په توګه په افغانستان کې د وروڼو قومونو ترمنځ د قوم، ژبې، سیمې، مذهب او تنظیم په نوم هر ډول تخریبي کړنې په کلکه غندي او هغو ته په افغانستان کې د ماتې خوړلي دښمن د پلان شویو سازشونو د یوې تخریبي هڅې په سترګه ګوري او په ټول توان سره یې مخنیوی کوي. افغان مجاهد ولسه! د بهرني اشغال په مقابل کې د افغان ولس مشروع دفاعي جهاد د الله تعالی په نصرت، ستاسې په ملاتړ، د مجاهدینو په بیساري اخلاص او سرښندنو، د اسلامي امارت په کامیابې دیپلوماسۍ او دسپلین ورځ تربلې ځواکمن کیږي چې له امله یې نړیوال مطرح جهتونه دهغه په موثریت، مشروعیت او موفقیت باندې اعتراف کوي. دغه کار اشغالګر دښمن سخت وارخطا کړی، نوځکه د اسلامي امارت په خلاف بې بنسټه تبلیغات کوي او زموږ د مجاهدینو لاسته راوړنې نورو ته منسوبوي.خو مونږ په دې اړه نړیوالو او خپل مجاهد ولس ته اطمنان ورکوو چې اسلامي امارت کله هم د یوه اشغالګر د شړلو لپاره بل چا ته په افغانستان کې د مداخلې اجازه نه ورکوي. د افغان ولس ملي حمایت د ټولو تیري کوونکو په مقابل کې زمونږ د بریالیتوب اصلي لامل دی. اسلامي امارت د هرهغه جهت چې د امریکايي اشغال په مقابل کې د افغان مجاهد ولس د برحق دفاعي مقاومت پر مشروعیت اعتراف کوي مننه کوي او له هغوی څخه غواړو چې له خپل نړیوال نفوذ څخه په کار اخیستلو سره امریکایان مجبورکړي چې نور د افغانستان اشغال ته د پای ټکی کیږدي. امریکایان هم باید د واقعیتونو په درک کولو سره د جهادي مقاومت د مقابلې په ځای د افغان مجاهد اولس د قانوني غوښتنو په منلو سره له دیپلوماتیکو لارو خپله ستونزه حل کړي،دسولي په مخ کي ترټولو لوی خنډ اشغال دی د اشغال په ختمېدوسره له سوله ایزې لارې د افغانستان د مسئلې حل د اسلامي امارت د تګلارې مهمه برخه ده ،د همدې لپاره یې سیاسي دفتر ته د سوله ایز حل د موندلو دنده سپارلې ده. د اسلامي نظام په سیوري کي سوله، رښتینی امنیت او د هیوادوالو سوکالي زموږ اساسي هدف دی. موږ په کلک عزم سره د خپل ولس اقتصادي، تعلیمي او هر اړخیز ودانیز پرمختګ ته تعهد لرو. اسلامي امارت د بیارغونې د چارو او پروسو هرکلی کوي او د خپلو ټاکلواصولو او لوائحو په رڼا کې په دې برخه کې د هر راز فعالیتونو ملاتړ او ساتنه خپله دنده بولي. مجاهدین دې پخپلو سیمو کې د دیني او عصري تعلیم او د ولس د غوښتنو سره سم د بیارغونې چارو د زمینې برابرولو کار ته دوام ورکړي. نړۍ والوته مو پیغام دادی چي: په نړۍ خصوصا په منځني ختیځ کي دي نور دمظلومانو دکړولوپه مخنیوي کي کوښښ وکړي، بي دفاع او بيوسه ولسونه دي نور دامریکا او اسرائیلو ظلمونو ته نه پریږدي ،همدارنګه د قطر هیواد او یو شمیر نورو عربي هیوادونو ترمنځ په وروستي جنجال دزړه له تله خپه یو او هیله موله وروڼوعربوهیوادونو څخه داده چي په خپل منځ کي هرډول لانجې دخپل منځي تفاهم له لاري حل کړي ترڅو یې ولسونه له ضرره اوهیوادونه یي دنوروله مداخلووساتل شي . د جهاد او سرښندنې په سنګرونو کې ناستو مجاهدینو وروڼو! تاسو باید په دې خوشاله اوسئ او شکر ادا کړئ چې الله تعالی په دې سخت وخت کې د خپل دین او ولس د ساتنې لپاره انتخاب کړي یاست. د خپل دین او مسلمانانو د دفاع په لاره کې جهاد له هغو افضلو اعمالو څخه دی چې رسول الله صلی الله علیه وسلم یې ( ذروة سنام الاسلام) یعنې د اسلام تر ټولو هسکه څوکه بولي. نو د روان جهاد په اړه د دښمن په تبلیغاتو، تعبیراتو او خبرو پسې سر مه ګرځوئ؛ بلکې د خپل دې عمل په اړه یوازې د کتاب الله او رسول الله صلی الله علیه وسلم تعریف کافي وبولئ. خو دې ته هم باید متوجه واوسئ چې جهاد چې څومره افضل عمل دی، همدومره ورسره تړلي خطرات هم درانه دي. الله دي نه کوي که مو په جهاد کې له لاسه تجاوز وشي، بې ګناه انسانان وځوروئ، یا د عامو خلکو سر، مال، یا حیثیت ته زیان ورسوئ؛ نو هم به منفور او بیقدره شئ او هم به په دنیا او اخرت کې د سزا مستحق وګرځئ. نو خپل چلند او کردار ته ډیر متوجه واوسئ او خپل ملګري هم له ناروا کړنو څخه را وګرځوئ. د جهادي عملیاتو د طرحه ریزۍ او اجراء په وخت کې د ملکي تلفاتو موضوع جدأ په نظر کې ولرئ. هغه عملیات چې په هغه کې د ولس د سر او مال ته زیان پیښیږي، موږ ته د منلو وړ ندي، له داسې عملیاتو صرف نظر وکړئ ځکه چې د خلکو سر او مال ته زیان رسول د شریعت د اصولو او د اسلامي امارت د پالیسۍ خلاف عمل دی. د جهاد په لاره کې خپلې حوصلې لوړې لرئ، د الله تعالی په نصرت ستاسو قوي تدابیرو، پوخ عزم او قربانۍ اشغالګر او د هغوی ملاتړي له وارخطايي سره مخ کړي، د دښمن دسیسې يې ناکامه کړې، ستاسو په مقابل کې د تبلیغاتو څپه يې بې تأثیره کړې، دا حالت ایجابوي چې هرمجاهد باید دخپل نیت اوعمل لا ډيرې اصلاح ته متوجه واوسي، د خپل صف وحدت او اتفاق وساتي، د خپلو مشرانو او مسئولینو لا ډيراطاعت وکړي، په هر دم او قدم کې د الله تعالی محاسبه او مواخذه په نظر کې ولري ، د الله له مخلوق سره په چلند کې خورا نرمي غوره کړي او له مؤمن ولس او مظلومو اسیرانو سره د دښمن ظالمانه چلند یې غیر شرعي انتقام ته ونه هڅوي بلکې د دښمن له اسیرانو سره د نبوي اخلاقو پر مبنا باید ښه چلند وکړي. جهادي مسئولین دې د دښمن دسیسو او ناڅاپي حملو ته همیشه ځیر اوسي، د ترڅار لاندې وسائلو له استعمال سره دي ډیر احتیاط وکړي د ځان او مجاهدینو له ژوند سره بي احتیاطي هم جهادي صف ته لوی زیان دی او هم اخروي مسئولیت لري. له خپلو ټولو هیوادوالو، علماء کرامو، پوهانو، مخورو، ولسي او سیاسي شخصیتونو، قلموالو، مسلکي کدرونو، د نوي نسل روزونکو استادانو او ټولو هغو کسانو نه چې په دې مظلوم ولس او ځپل شوي هیواد یې زړه خوږیږي هم غواړم چې د جګړې د اصلي عاملینو امریکایي یرغلګرو په وړاندې په یوه غږ ودریږي. په پای کي له ټولو هیوادوالو څخه هیله کوم چي هر وخت په تیره بیا د اختر په دي مبارکو شپو ورځو کي ټول بي وزله وروڼه او خویندي هغه که یتیمان وي که د شهیدانو او اسیرانو کورنۍ او که نور بیوزله کسان وي په خوښیو کي له ځان سره شریک کړي او د خپل وس په اندازه یې لاس نیوی وکړي. والســــــــــــــــــــــــلام داسلامي امارت زعیم امیرالمؤمنین شیخ الحدیث مولوي هبة الله اخندزاده ۲۷ رمضان المبارک ۱۴۳۸ ه ق ۱۳۹۶/۴/۱ ه ش ٢٠١٧/٦/٢٢ م