Tuesday, 23 May, 2017
 
 
  • دغزني د نجونو په ښوونځي کې ‎ چاودنه شوې
  • دطالبانود قلعه زال ولسوال وژل شوى
  • ټرمپ اوغني په سعودي کې سره وکتل
  • دلوگريوديني عالم وژل شوى
  • طالبانو په زابل کې ٢٥ پوليس وژلي دي
  • دننگرهار په غني خيلو کې ٥ پوليس وژل شوي دي
د شهيد امام حسن البناء رحمة الله عليه لس نصيحتونه
ژباړه:مولوي امين الله ازره وال
لومړی: زما مسلمانه وروره! په دنيا کې بې هدفه ژوند مه تېروه، ځکه چې ته الله تعالی عبث او بې فايدې نه يې پيداکړی .(ته الله تعالی د عبادت او بندګۍ لپاره پيدا کړی يې په دې هکله به د قيامت په ورځ الله تعالی درسره حساب او کتاب کوي که پوره مؤمن وې او د الله تعالی حکمونه دې پرځای کړي وو نو جنت ته به دې داخل کړي او که په حساب کتاب کې پاتې راغلې نو د الله تعالی له لوري د سخت عذاب وېره ده ) دوهم: مسلمانه وروره! د الله تعالی رضاء بايد ستا تلپاتې هدف او موخه وي او د الله تعالی دې وينا ته ته غوږشه چې فرمايلي دي: (فَفِرُّوا إِلَى اللَّهِ إِنِّي لَكُمْ مِنْهُ نَذِيرٌ مُبِينٌ (50) الذاريات. الله تعالی ته ور پرتېښته شئ بېشکه زه ستاسې لپاره (د الله تعالی له عذاب څخه) ښکاره وېرونکی يم.(د الله تعالی عذاب څخه به هلته انسان په امن شي چې د الله تعالی حکمونه ومني او غاړه ورته کيږدي نو د الله تعالی عذاب څخه الله تعالی ته پناه ور وړئ ) درېيم: زمامسلمانه وروره! ته په دنياکې يوازې پر دوه شيانو پسې زيات حرص کوې چې يو د روزۍ ګټل او بل د اجل نېټه اوږديدل دي او دا په داسې حال کې چې ددې شيانو واک يوازې له الله تعالی سره دی . نو پر دې شيانو(روزي او اجل) حرص کول دې تا د حق لپاره د کار کولو څخه منع نکړي. (روزي چې الله تعالی د چا لپاره کومه اندازه مقرره کړې وي، هغه نه څوک زياتولی شي او نه کمولی، او د عمر چې کومه نېټه الله پاک ټاکلې ده هغه نه اوږديږي او نه لنډيږي، په کومه ورځ چې د مرګ ټاکلې موده راورسېده انسان په دغه وخت مري، دغه موده نه څوک مخکې کولای شي او نه يې اوږدولای شي. کله چې يو مسلمان پر دې عقيده شي او دا يې باور شي چې مرګ، ژوند او روزي واړه يوازې د الله تعالی په اختيار کې دی نو بايد د دين، آخرت او حق لپاره په جدي توګه کار وکړي، د روزۍ ګټل او د مرګ وېره دې ورته د حق، دين او آخرت لپاره د کار کولو څخه مانع نه شي ) څلورم: زما مسلمانه وروره! قومونه او ملتونه د سرښندنې او قربانۍ په پايله کې را پورته کېږي، دعوتونه د افرادو د وفادارۍ پربنسټ پرخپلو پښو دريږي،که چېرې د امت د خدمت لپاره ژوند تېروې نو د امت د خدمت په لاره کې قرباني ورکړه او که پرخپل دعوت باورلرې نو له خپل دعوت سره د وفادارۍ لپاره هڅه او کوښښ وکړه. (پريوتې پرګنې او ملتونه هلته له ذلت څخه د عزت مقام ته را پورته کېږي چې د خپل عزت لپاره سرښندنې او قربانۍ ته چمتو شي او په دې هکله هر اړخيزه هڅه او هاند وکړي، يو دعوت او جماعت هلته بری مومي چې افراد يې له دعوت او جماعت سره وفا ولري او د ملت د خدمت په لاره کې سرښندونکي اوسي، کله چې باور، وفا او قرباني نه وي ، هېڅکله هم کوم ذليل قوم عزت نه شي ترلاسه کولای او که د افرادو وفاداري نه وي هېڅ دعوت پرخپلو پښو نشي دريدلای ) پنځم: زما وروره! هغه وينا نورو ته مکوه چې د عمل جامه نه وراغوندې. او پر دې خبره دوکه نشې چې خلک دې عمل کوونکی وشمېري، ستا هم او غم بايد دا وي چې ته د الله تعالی پر وړاندې رښتينی عامل وخېژې، ځکه چې(که چېرې ته د خلکو په وړاندې عمل کوونکی وګڼل شې او د الله تعالی پر وړاندې صادق نه يې) نور خلک تا له الله تعالی څخه نشي خلاصولای. شپږم: زما وروره! ستا لپاره هېڅ داسې دوست او ملګری نشته چې له دې دنيا پرته په آخرت کې هم ستا په ښه راشي، هو! يوازې يو ملګری شته چې په دنيا کې تاته ګټه رسوي او په آخرت کې هم ستا ملګرتيا کوي چې هغه نېک او غوره عمل دی، نو حرص کوه چې داسې عمل تر سره کړې چې په دنيا او آخرت کې ستا لپاره ګټور تمام شي، او په هر حالت کې ستا په درد وخوري، او د الله تعالی دا قول در په ياد کړه چې فرمايي: يَاأَيُّهَا الرُّسُلُ كُلُوا مِنَ الطَّيِّبَاتِ وَاعْمَلُوا صَالِحًا إِنِّي بِمَا تَعْمَلُونَ عَلِيمٌ (51) المؤمنون. ژباړه:ای پيغمبرانو! له پاکيزه(حلالو) شيانو څخه خوراک وکړئ او صالح عمل ترسره کړئ ځکه چې زه پرهغو شيانو چې تاسې سرته رسوئ ښه عالم يم. اووم: وروره! ستا زړه د الله تعالی د نظر کولو محل دی (الله تعالی ستا زړه ته ګوري) نو پام کوه چې پر بېکاره خصومتونو او بې ځايه جګړو يې خچن نکړې، ځکه چې دا بې ځايه خصومتونه په دنيا کې د الله تعالی او بنده ترمنځ حايل او پرده کېږي او په آخرت کې لوی عذاب دی هغه ورځ چې يَوْمَ لَا يَنْفَعُ مَالٌ وَلَا بَنُونَ (88) إِلَّا مَنْ أَتَى اللَّهَ بِقَلْبٍ سَلِيمٍ (89)الشعراء. ژیاړه: هغه ورځ چې نه به مال ګټه رسوي اونه زامن مګر هغه څوک چې الله ته له سالم زړه سره راشي. اتم: ای وروره! هڅه وکړه چې پر خپل فکر داسې ايمان او باور پيدا کړې چې ستا هيلې او عمل هغه ته غاړه کيږدي او د الله تعالی دې قول ته غوږ شه: يَاأَيُّهَا الَّذِينَ آمَنُوا اتَّقُوا اللَّهَ وَكُونُوا مَعَ الصَّادِقِينَ (119) التوبة ژباړه: ای د ايمان څښتنانو! له الله تعالی څخه ووېرېږئ او د صادقانو له جملې څخه شئ. نهم: ای وروره!په دې باوري اوسه چې ته د دوو موخو او اهدافو لپاره کارکوې: لومړی داچې ستا کار په دنيا کې مثبته پايله ولري او که دا نه وي نو خپله فريضه به دې ترسره کړې وي که اول مقصد ته ونه رسېدې نو هغه دوهم مقصد خو نه در څخه فوت کېږي (چې د خپلې فريضې ترسره کول دي) په دې هکله الله تعالی داسې فرمايي: (قَالُوا مَعْذِرَةً إِلَى رَبِّكُمْ وَلَعَلَّهُمْ يَتَّقُونَ) (164)الاعراف. لسم: ای وروره! مرګ هرومرو راتلونکی دی، نوخپل مرګ د الله تعالی په لارکې وګرځوه ځکه چې ځان په حق کې فنا کول عين بقاء ده او کله چې ته د الله تعالی په لار کې د شهادت په مرګ مړ شې نو شرف، اجر، تلپاتی نوم او ژوندون به ترلاسه کړې او دا په داسې حال کې چې هېڅ تاوان به دې هم نه وي کړی، الله تعالی فرمايي: (وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ )(169) آل عمران ژباړه: پرهغه چا چې د الله تعالی په لاره کې ووژل شي د مړو ګمان مه کوئ بلکې هغوی ژوندي دي د خپل رب په وړاندې روزي ورکول کېږي. ماخذ:مجموعه رسائل الامام البناء رحمة الله عليه
 
 
سوداګريزې خبرتياوې

 
نوې لیکنې
 
پېښې،اندېښنې اوڅرګندونې